ភ្នំពេញ៖ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបង្ហោះសារក្នុងបណ្ដាញសង្គម Twitter របស់លោកស្រីនៅព្រឹកថ្ងៃទី២៥ ខែវិច្ឆិកា ឆ្នាំ២០២២ ដោយបានជូនពរដល់ពលរដ្ឋទាំងអស់ប្រកបទៅដោយភាពរុងរឿងចម្រុងចម្រើន មានសុខភាពល្អ និងមានសុខសុវត្ថិភាព មានភាពឆ្លាតវៃក្នុងការប្រកបការងារផ្សេងៗ។

មិនមែនជារឿងចៃដន្យទេដែលលោកស្រីអ្នកនាំពាក្យក្រសួងសុខាភិបាលជូនពរបែបនេះ។ ការលើកឡើងនេះគឺក្នុងឱកាសនៃទិវានៃការគ្របដណ្ដប់សុខភាពជាសកលឆ្នាំ២០២២ ដែលនឹងខិតចូលមកដល់នៅថ្ងៃទី១២ ខែ១២ ឆ្នាំ២០២២ខាងមុខ។

ក្រៅពីបានជូនពរលោកស្រីបានសរសេរក្នុង Twitter លោកស្រីដោយជំរុញដល់ប្រជាពលរដ្ឋទាំងអស់បន្តអនុវត្តន៍នូវការការពារការចម្លងវីរុសកូវីដ-១៩ នានាឱ្យបានខ្ជាប់ខ្ជួន រួមទាំងចូលរួមចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ដូសផងដែរ។

លោកស្រីបន្ថែមថា៖ «ដើម្បីសម្រេចបាននិរន្តភាពនៃការរស់នៅធម្មតាតាមគន្លងប្រក្រតីភាពថ្មី ព្រមទាំងចូលរួមចំណែកអនុវត្តស្របតាមពាក្យស្លោក “រួមគ្នា យើងអាចបញ្ឈប់ការចម្លងវីរុសកូវីដ-១៩” និងទទួលបានភាពរីករាយនាពេលអនាគត»។

លោកស្រី ឱ វណ្ណឌីន ក៏បានលើកឡើងថាភាពសុខដុមរមនា សុខភាពល្អ និងភាពរីកចម្រើនរបស់ពលរដ្ឋបច្ចុប្បន្នគឺមិនអាចខ្វះទេនូវសន្ដិភាពដែលបានធានាការពាររាល់រឿងទាំងអស់នេះ៕